SERKAWN TUALCHHUNG KOHHRAN

PATHIANNI ZING PROGRAMME

10:00 AM, 7th June, 2020

---

PROGRAMME:

---

Tawngtai rualna

Tawngtaina a Hriat Turte
1. Lockdown 5.0 avangin hun engemaw chen chu Biakin ah a huho chuan kan la inkhawm thei dawn lo leh ta a. Kan inkhawm theih loh hun chhung hi inthlahdah nana hmang lova, thlarau nuna hmasawnna leh chak zawkna atana mimal leh chhungkua ten kan hman tangkai theihna turin Pathian hnenah inhlan thar zel ila.
2. Mi ram leh states dangte anga buaina leh harsatna nasa tak thleng rih lova Pathian ven himna leh hruaina tun thlenga kan la chan avangin Pathian hnenah lawmthu sawi ila.
3. Covid19 chu India ramah lo darh zau zelin Mizoram ngeiah pawh vei kan lo awm ta nual a. Nasa zawka a darh zel lohna turin Pathian hnenah dil ila. Tuna vei mek leh an chhungte tan leh anmahni enkawlna hna thawktute tan tawngtai sak ila.
4. Sawrkar, Kohhran leh khawtlang hruaitu zawng zawngte te tan, covid19 leh Covid19 in harsatna hrang hrang a thlen dona an hmalaknaah Pathian hruaina leh tanpuina dil sak ila. Covid19 dona, invenna leh enkawlna kawnga hma la tu zawng zawngte tan dilsak ila.
5. Quarantine centre-a awm mekte leh anmahni enkawlna hna thawktute tan dilsak ila. Covid19 kaihhnawih harsatna tawktu zawng zawngte tan tawngtai sak ila.
6. Mipuiten Sawrkar in kan himna atana dan a siamte thuawih taka kan zawm zel theihna turin tawngtai ila.
7. Kan thawhlawm leh thuchah kan ngaihthlak tur Pathian hnenah hlan ila, chhungkuain tul kan tih apiang i thawhkhawm bawk ila

Special Item (Nei thei remchangte tan)

• Naupang recitation/solo etc

Bible chhiar tur:

• Isaia 45 : 5-8
• Sam 46 : 1-11
• Joh 14 : 1-4

1. Ka duhzawng nge Pathian duhzawng ?
Ka Lalpa hmangaih aw nem chuan, Ka duhzawng ti a ka awm laiin.
Ti hian min zawt, ka thinlungah; Nangin kei hi min hmamgaih em?
Thuhriltu ropui tak, Pu F.Laltuaia hun lai khan he hla tha tak mai hi kan sa lar hle a, Ka duh zawng ti a ka awm laiin, tih thu hi lo ngaihtuah hmasa ila. Tunlai mihringte hian kan duhzawng ti leh ngaihtuahin kan hun kan hmang nasa lehzual ta hle mai.
Ka duhzawng, kan duhzawng tiin khawvel mihringte hi kan phe suau suau a ni ber mai a, Kohhran pawh kan bang lo hial thin em, kan Kohhran, kan pawl tih chakna tur leh kan program tih hlawhtlinna tur hi ngaihtuah in, buai leh hah takin kan phe ve thin em ? Pathian duhzawng nge keimahni duhzawng, kan rilru luahkhattu hi, tih inchhut ila. Pathianin aw ring takin keimahni duhzawng ni lovin Ama duhzawng ngaihtuah a, Ama duhzawng ti ve tawh turin min ko mek a nih hi.

2. Ngawi ula Pathian ka ni tih hre rawh u
Ngawi tih hi engmah sawi lova hmui chip satliah ni lovin thinlung lam ngawi sawina niin a lang. Kan thinlung hi he khawvela kan duhzawng ngaihtuahna hian a bengchheng hle a, engkim neitu Pathian lam kan ngaihtuah hman lo hle.
Pathian chuan keimahni duhzawng hlir zawng lova Ama duhzawng engnge ni, ti a inchhut ve in Ama duhzawng chu uma, Ama duhzawng chu ti a tihtakzeta Amah chibai buk a Pathian a nih zia hre reng turin min phut a ni, tih hre thar leh ila.

A tawi zawngin sawi ta ila - 3. Thu I awih ang u
Pathian a ni, tih hriat mai a tawk lo va a duhzawng kan tih min phut a ni. Kan duhzawng nen a inmil loh hun chuan Pathian thu awih hi har kan ti hle thin.
Tun lockdown chhung hian kan himna turin puipun leh in hawrkhawm a tha lo tih te, hmai tuamna hman thin leh kutsil fo thinte hi thil tul a ni, tih hre reng chungin ti tha peih lo kan tam hle, Kohhran leh khawtlang ang pawh a thu pek zawm lo kan la tam hle a ni.
Keimahni duh ang anga nun hi a him lo va, chuvangin Pathian duhzawng ngaihtuah lo va, Ama thu zawm lova keimahni thu leh kan duhzawng ang a khawsa lovin thuawih I zir thar leh ang u.

4. Innghahna rintlak
Pathian hi inghahna rintlak a ni a, he khawvel a natna leh buaina lak min hum theitu mai ni lovin Chatuan ram thlenga Nun kan neihna tur, kawng leh thutak chu a ni a, Pathian ah lo chuan himna tluantling a awm lo, a hnenah intulut thar leh ila, Amah ringin nun hahchawl leh thlamuang kan nei theuh thei ang. Lalpan malsawm che u rawh se.
Hla sak hona: Khb No 435: Hlau suh ka awmpui ang che