THUCHAH:

PATHIAN HNENA THILPEK

Vawiin hi kan hriat angin Buhfaitham Pathian Ni a ni a. Buhfaitham hmanga kan rawngbawlna lam chanchin chu thui tak sawi a tul awm love.A pawimawhna leh hlutna chu kan hre tlangpuiah ngai ta ila, ziaktu pakhat chuan ti hian a sawi a;” Rawngbawlnaah hian Setana’n a buaipui leh tihngaihna a hriat loh ber chu nute’n chawchhum dawn a buhfai an tham thin hi a ni. tih dan-ah an neih tlat tawh a, a tlingkhawm hi a tam thei viau bawk si a,a buaipuiawm khawp mai,” tiin. Buhfaitham hmanga kan rawngbawlna hian thlarau bo tam tak Krista hnenah a hruai thleng a ni tih hria-in thahnemngai takin I chhunzawm zel ang u.

Tukina Pathian thu-a kan inpawlho nan chuan “Pathian hnena thilpek” tih kan hmang dawn a ni.Rilru inhawng tak chunga kan ngaihtuah pawh a tul awm e. Kristiante tan chuan kan thupui Pathian hnena thilpek tih chu thu thar hlam a ni tawh hauh lova, kristianna nen chuan thil then hran theih loh,kal dun zel, inhne rial, kristianna a awm tawhna hmunah chuan awm ve zel ,aserh zinga a mei ang tlat a ni a tih theih awm e. Kristianna chu Pathian thilthlawnpek-ah a innghat a, Pathian leh midangte tana inpek let ve leh nain kristianna chuan hlet a chhuah thin a ni. Chuvangin kristianna leh Pathian hnena thilpek chu thil kal dun zel,then hran theih loh, Pathian kan rin dan leh kan hmangaihna pholanna hmun (Demonstration field) chu a ni.

Pathian hnena thilpek awmzia, a nihna leh pawimawhna te hetiang hian enzui ta ila:

1. A tawngkam awmzia
(Terminological meaning) Thilpek tih chuan petu leh thilpek dawngtu inkar chung chang, an inlaichin dan, an inkungkaih dan,an inzawm dan a tarlang nghalin, mi pahnihte inkar thu a an inlaichin dan emaw an inngaihsak tawn dan chung chang a tarlang nghal a ni.Mihringte inlaichinna, inthianna, inunauna hi thil intihsak tawnah a lo langchhuak thin a.Pathian hnenah emaw kan mihring pui te hnenah a ni emaw thilpek duhna kan neih loh chuan midangte chu unau, laichin, thian a siam kan duh lo tihna a ni. Kan inthianna te kan inhmangaihna te kan induhsakna te chu thil kan intihsak/ thil ka inpek-ah hian a lo langchhuak thin a ni. Kan thil inpek, intihsak hlut dan chu kan inlaichinna dinhmun tichiangtu pawh a ni thin a ni.Pathian nen kan inlaichin dan pawh a hnena thil kan pek dan hian a tifiah thin a ni.

2. Pathian kan hmangaih dan puanchhuahna a ni.
Dr.OM Roa chuan, “Hmangaihna tel lovin thil a pek theih a, thilpek tel lovin midang a hmangaih theih loh,” a ti a. Kan hmangaihte chu thilpek hlan kan chak zawk thin a ni.Kan hmangaih zawh pauh leh an hnena thil hlan kan chakna leh duhna pawh a nasa tulh tulh thin a ni a, chu mi in a lan tir chu hmangaihna chuan thilpek duhna a cho chhuak thin tihna a nih chu. Chuvangin Pathian hnena thilpek kan duhna leh kan chakna chu Pathian kan hmangaihna tiat zelin a thang lian in a lo lang chhuak ve zel dawn a nih chu.

3. Pathian chu a thlawn a thil min petu a ni.
Pathian nihna ropui tak leh hlu tak mai chu a thlawn a thil min petu leh tihsaktu a ni hi a ni. A thlawnin damna, hriselna, nunna leh kan taksa mamawh min pe a, kan thlarau nunna atan phei chuan a fapa mal neihchhun nunna ngei a thlawnin min pe a ni. Chuti tak a min hmangaihtu,a thlawna kan mamawh engkim min petu, a fapa nunna ngei pawh min petu chu kan hmangaih let ve,kan duhsak ve, chu mi ang pangngai tan chuan thiltih awm reng a ni. Mihring nihphung pangngaiah pawh min duhsaktu, min khawngaihtu,min ngaihtuah a min chhawmdawltute chu kan hmangaihin kan duhsak let ve a ni ngai a, chuvangin engkim min petu hnena kan theihna sang ber hlan ve hi kan tih awm reng a lo ni. Ringtute hi Pathianin Kristaa nun min pek changtute kan ni a, chu kristaa kan nun chan chu Pathian hmangaihtu, a duhzawng tih chu chaw tui bera neihtu, thil dang zawng ai pawha a ngaih pawimawh a nih avangin chu nun chu ringtuteah hian a lo langchhuakin Pathian hmangaihna-ah a lo thang lian ve thin a ni.

4. Thilpek hi Pathianin ringtute min hlanna a ni.
“A nunga te chu an mahni tan an nun tawh lohva, an thih aia thi atan chuan an nun tawh zawkna turin a ni, mi zawng zawng thih aiin a thih ni” Pathian hnena thil pekna chuan kan nun hi mahni tan mai ni tawh lova midangte tana nung kan nihna a lantir a ni. Mi, mahni tanghmasial (selfish) tak chuan thilpek a harsat fo thin. A ma tan thil engkim mai hi a hauh vek a, midang te a nunah an leng tak tak ngai lovin midangin hmun (Room) an nei thei tak tak ngai lo a ni. Mahni hlawkna leh hamthatna lamin an nun a kaihhruai chak tlat avangin an nunah Pathian leh midangte’n lalna an chang thei ngai lo a ni.

5. Pathian hnena thilpek chu ringtu nun insawizawina(running track) a ni.
Ringtu hmasate nun kawng kan en chuan , Rinna fiahna kawngah Pathian hian a hruai fo mai.Ringtu nun puitling nei turin mihring ngaihdan leh thlir dana thil harsa, huphurhawm, tawrhna leh channa anga lang ram paltlang a ngai fo thin. Pathian hnena thil pe tur leh a ram tana insenso ngaihna tur a lo awm/ lan changte hian harsa kan ti fovin a pumpelhna dap mai a awl hle thin. A hnena pe tura min koh hian , min chhuhsak, min tihheu, min tihretheih min tihral a duh leh tum vang a ni ngai lova, malsawmna tam zawk kan dawn theihna dawhthleng atan he kawng hi min thlan sak zawk a ni. Lk 6: 38,

6. Thlarau bo man nana rawngbawlna remchang ber a ni.
Fak hla siamtu chuan,” Kei zawng Lalpa tan theihna ka nei lo, Kalchhuakin ka hrilthiam ve si lova. Ka neih chhun,ka theih tawk a tana ka pek tlemte hi, Ka rochan aw ka thiam tawk ka tan lawmna.” a lo ti a. Pathian hian kan neih bak atangin pe turin min ti ngai lova, Malsawmna kan chan atanga atan kan pek ve hi min pawmsak lovin thil dang hi rawngbawl nan min phut ta sela, rawngbawl thei lo tur mi tam tak kan awm zawk ngei ang. Chuvangin Pathian rawng kan bawl ve nan a hnena thil pek hlan hi kan tan a remchang a ni tih hriain, malsawmna kan chante nen Lalpa chibai buk zel turin I inbuatsaih thar zel ang u. Chutiang inthawina chungah chuan Lalpa a lung ni em em si a. ( Heb 13: 16.)

“I thilpek hlu tak avangin thlarau bo te’n Lal Isua an lo hmu ta. Halleluiah. Lalpan a thu kan sawite mal min sawm sak theuh rawh se. AMEN.

Tawpna Hla : KHB No.591 “Amah chu malsawmna hnar a ni ”

LALPA TAWNGTAINA