Kan duhzawng hla thlan ni se. (Thilpek lakkhawmna)
TAWNGTAI RUALNA
Tawngtaina a Hriat Turte
Pathianin vawiin thlenga hun tha min pe a, kan nunna min zuah a, Amah be thei leh chawimawi theia remchanna min la siam sak avangin lawmthu i sawi ang u.
Covid-19 hrileng laka Pathian venhimna mak tak mai kan chan avangin lawmthu i sawi leh ila, Covid vei enkawl mekte, enkawl tute tan i dil chhunzawm zel ang u.
Hun rei tak kan Biak in sak kan chawlh hnuin kan lo chhunzawm leh thei dawn a, Pathian hnenah lawmthu i sawi ila, mawhphurtute leh hnathawktute pawh i tawngtai sak ang u.
Kan hun tawnin ziaawm lam a pan zel a, inkhawm dan turte pawh sorkar lamin a rawn ruahman tan a. Kan kohhran hruaituten Pathian rawn chunga kan kohhran tana tha ber tur an rawn chhawp chhuah theih nan i tawngtaisak ang u.
Chhungkua in kan ngaihpawimawh dang thawh belh ila, kan thawhlawmte Pathian hnenah hlanna i nei bawk ang u.
THUCHAH
Thupui: HERMON DAIFIM
- Rev Lalremsiama Fanai
Audio
Vawiin Pathian ni a lo thleng leh ta. Kohhran hote kan Lalpa Isua Krista hmingin chibai ka buk a che u.
Tukin chu ka thinlungah naupan laia kan thuvawn thin Pathian thu lar tak sam 133 na ami ‘Hermon Daifim’ tih thu hi a lian hle mai. Hemi behchhan hian Pathian thu kan ngaihtuah ho dawn a ni.
Pathian thu I lo chhiar ang u.
“Ngai teh, unaute inngeih dial diala awm khawm hi a va tha in a va nuam em! Lua hriak hlu tak, Khabe hmula luang thla,, Arona khabe hmul ngeia luang thlaa, A kawrfual hmawra luang thla ang kha a ni; Hermon daifim, Zion tlangtea tla thin ang hi a ni: Chutah chuan Lalpan malsawmna thu a pe a, Kumkhuaa nunna tur chu.”(Sam 133)
He Sam hi tawite, vawn tham lek a ni a. A thu ken pawh a tam lemlo. ‘Pathian mite inpumkhat hlawkna a sawi’ ti ila kan sawi zo der a ni mai.
Sam 120 na atanga 134 na thleng hi ‘Chhoh hla’ tih a ni a. Kumtinin, Kalhlen kut hmang turin Juda mipuite Jerusalem ah an zin thin a. Chung kut an hmanna ah chuan heng Sam te hi an hmang uar hle a ni. Ramchhung hmun hrang hrang atangin chhungkaw hrang hrang kha Jerusalem ah kut hmang turin an kalkhawmin an han khawsa ho ta kha a ni a, inpumkhatna an mamawh hle a ni mai thei a ni.
Hermon Daifim:
Kan thupui ah lut nghal mai ila. Hermon tlang hi Israel hmar lam a awm a ni a, Lebanon leh Syria ramri thlengin a inkham a. Isarel rama tlang sang ber niin, tuifinriat zawl atanga tehin 9000ft. laia sang a ni. A boruak vawt raih mai leh dai tam tak tla thin te avang chuan hriat a hlawh hle. Thlasikah chuan a tlang chhip te chu vurin a khuh var luk thin. Heng dai lrh vurte hian Hermon tlang bul vel ro lutuk tur te chu a ti hnawng in, thlai leh nunna nei dangte tan chawmtu tha tak a ni. Israel rama lui pawimawh em em Jordan lui chawmtu a ni bawk. A pawimawh zia kan hrethiam mai awm e.
Helai thua kan hmuh ve tho, tlang lar em em Zion tlang nen han khaikhin ta ila. Zion tlang hi chu Israel chhim lama awm a ni a. Feet 2400 chauhva sang a ni. Hermon tlang ang lo takin a boruak a lumin a ro em em a, ruah a sur khatin, dai pawh a tla ve ngai lo. Sam 133:3 naa “Hermon daifim Zion tlangtea tla thin ang hi a ni’ tih thu hi kan ngaihtuah ngai em? A mak riau a sin. Hmar lama Hermon tlanga daifim, chhimlama awm Zion tlanga han tlak daih mai chu. Amaherawhchu Pathian thu hian tum a nei a, ringtu inpawlkhawmte, kohhran ho nun dan tur dik tak chiang takin min tarlan sak a ni.
Chang 3 thua ‘tla’ tih hi chang hnih thua ‘luang’ tih nen hian tum thuhmun a ni a. Pathian malsawmna ‘Inpumkhatna’ chu van atanga lo intanin, ringtuten kan lo dawng a. Tu emaw ni ve riauin han inhre thin mah ila Pathian tel lo chuan Zion tlang, a chawmtu leh tihnawngtu Hermon tlang tel lo ang maia ro leh ruak kan lo ni. Amaherawhchu, Zion tlangin Hermon tlang malsawmna a dawng ang mai in Pathian malsawmna chu kan dawng thin a nih hi.
Heta lo lang chiang ta em em chu Hermon tlang leh Zion tlang a inzawm tlat ang hian kohhran chu ringtu inpawlho mi chitin, in anglo tak tak, mi lian leh mi te, khawsak sang leh khawsak hniam deuhte awmna ni mah ila, inzawm tlat, pumkhat kan ni tih hi a ni. Pathian thu chuan “Chutah chuan Juda mi a awm theih lova, Grik mi pawh a awm theih hek loh, chutah chuan bawih a awm theih lova, bawih lo pawh a awm theih hek loh, chutah chuan mipa leh hmeichhia pawh a awm theih hek loh; Krista Isuaah chuan in zain pumkhat in ni si a.” (Galatia 3:28) min ti a ni. Mitin mai hi kan hmel leh kan pianzia, kan hnathawh leh eizawnna, kan duhzawng leh ngaihsan zawngte hi hrang nuai mahsela, Kristaah chuan pumhnih ni lovin pumkhat kan ni si.
Kan nitin nuna thil thleng mek te kan thlir chuan, hnam khat nisi, ram khat leh khawtual hmun khata chengte, kohhran pakhata lawi te pawh tawngkama na tak taka inbeihna, social media hmanga inbeihna, tharum thawhna, phuba inlak tawnna, hriat tur a tam a, chhiar tur a tamin, hmuh tur a tam hle mai. Dik kan inti theuh bawk si. Tun hnaia khawvel ram ropui leh thil ti thei USA President thlan boruak te pawh kan hre vek mai. Inpumkhatna lam an va hawi lo em. Engpawhnisela, keini Pathian kohhran ho Krista thisen hlu taka a leite hi chuan min tlantu duhdan leh min tawngtaisakna tihhlawhtlin hi kan tum tlat dawn lawm ni?
Kohhran hote hi Krista avangin unau kan ni a. Sam 133 hian Unaute inngeih dial dial a awmkhawm that zia leh nawm zia chiang takin min hrilh a. He Sam dawng hmasa bertu Israel hnam hrang hrang thlahtute chu unau dik tak, thlahtu hmun khat nei, mipakhat hrin vek an ni a. Chutiang chuan keini kohhran hote pawh hi pa (father) ber atana Pathian pakhat neitu kan nih avangin chhungkua kan ni a. Pathian chhungkuaa tel ve hi ringtute tan chuan kan thlan leh chuan pawh ngai lovin chhungkaw member kan ni nghal a ni. Tukinah hian mahni theuh inzawt ta ila ‘Pathian chhungkuaa ami i ni a, engtin nge chu chhungkaw tan chuan i nun ang? Chhungkaw inpumkhatna siamtha zawngin nge, inpumkhatna tichhe zawngin? Kaina chuan a nau Abela a that a. Josefa chu a unauten sal atan an hralh a. Isua zirtirte pawh kha ropui zawk nih inchuhin an inhnial luai luai a nih kha. Han inhnial changte, tu lakah emaw thinrim taka han awm changte pawh kan nei ang. Kan inrem lohna leh inhriatthiam lohna te hneha, siamtha tura kan thawhho fo a ngai a ni. Chhungkaw inpumkhatlo, kohhran inpumkhatlo, khawtlang inpumkhat lo, ram inpumkhat lo chu a nuam ngai lovang. Hebrai ziaktuin “unaua inhmangaihna hi awm zel rawh se” (Heb.13:1) a tih angin unau kan ni a i inhmangaih tlang zel ang u. Chumi ah chuan miten Pathian fate kan ni tih an hre dawn si a.
Lalpan a thu in zavai atan malsawm rawh se.
Hla : KHB No. 507- Aw van thlarau thianghlim lo leng ang che.
Tawpna: Lalpa tawngtaina
Kristian Hla bu No. 507 : “ Aw, van Thlarau thianghlim lo lêng ang che,“
1. Aw, van Thlarau thianghlim lo lêng ang che,
Min awmpuia vêng him thintu kha;
Khawngaihna aw haider thin mah ila,
Sual tuipuia kan pil min phal suh la.
Vâkvai leh kal bo tate,
Hnehna puang chhuak thei lo hliam tuar mêkte,
Hruai kîrin kan tidam zo si lo,
Tlaini lên a har ngei e, i tel lo chuan.
2. Vân hmangaihna pâr tlâna lêng hnu pawh,
Sual vânga rûm châng ni tawn châng hian;
Auvin i lam hi kan lo hawi zêl dâwn,
Kan lam hawiin chakna thar min siam rawh.
3. Kohhrante hi thawk rim ṭhîn mah ila,
Nangman i duhzâwng min zirtîr rawh;
Kawng dik emaw kan tih dik lo si hi,
Rinna mitin min hmuh fiahtîr ang che.
4. Aw Nang, chatuan Lalpa, i tel lo chuan,
He leia ro sum leh engkim hian,
Ropuina leh awmzia rêng a nei lo,
Kan chakna leh lâwmna i lo ni e.
