Hla sak hona:Khb N0.79. : Khawvel lawm nan a lo kal a(Thilpek lakkhawmna)
Audio
Khawvel lawm nan a lo kal a
Khawvel lawm nan a lo kal a,
Leiin a Lal lawm se;
Thinglung tinin hmun lo kian se,
Lei leh van zai rawh se, (2)
Van leh khawvel zai rawh se.
Khawvel lawm nan ro a rel a,
Miten zaiin fak se;
Tlang leh phai leh luite pawhin,
An lawm hla nawn rawh se, (2)
Nawn rawh se, an lawmna hla chu.
Khawngaih leh thutakin a rel,
Hnamte an lo ding chhuak;
A felna ropui tak mai chu,
A hmangaihna hlu chu, (2)
Mak an ti, a hmangaihna chu.
TAWNGTAI RUALNA
Tawngtaina a Hriat Turte
Pathian ropui leh thiltithei, Khawvela thil thleng zawng zawng chunga thuneitu kan neih avangin a hnenah lawmthu sawi ila. Chawimawina leh ropuina i hlan, a hruaia awm zel turin mimal tin a hnenah vawiinah hian i in tulut thar ang u.
Covid19 avangin a huhovin la inkhawm thei lo mah ila, chhungkua leh mimal anga Pathian biakna hun tha kan la neih theih avangin lawmthu i sawi ang u. Covid19 hripui a reh hunah pawh chhungkua leh mimal nuna Pathian pawlna nung nei chhunzawm thei turin Pathian hnenah inhlan ila. Pathianin rem a tih chuan a huhova Amah Biakna hun kan neih leh thuai theih nan Pathian hnenah i dil ang u.
Kan ramri buai chungchang Pathian hnenah thlen ila, Pathian duhdana kan hruaituten fing leh thiam taka ramri chungchanga hma an lak theih nan Pathian hnenah i dil ang u. Kan ram chin dik tak hi kan neih ngei theih nan Pathian i dil zel ang u.
Tunah chuan Covid19 hian Mizoram min lo luh chilh ve tak tak ta a, thihpui leh ICU a enkawl ngai engemawzat kan lo awm ta a. A tuartu te leh an chhungte zawng zawng tan tawngtai sak ila. Tin, community spread hi a nasat zel lohna turin Pathian venhimna dil chhunzawm zel ila.
Covid19 vei enkawltu zawng zawngte tan Pathian venhimna leh Pathian atanga chakna thar leh hmangaihna nena covid19 vei damlo te an enkawl theihna turin dil sak ila. Tin, mipuite hian thuawih taka kan himna tur te kan zawm a, kan fimkhur zel theihna turin Pathian tanpuina dil ila.
Kan Missionary te tawngtai sak ila. Covid19 in a tihbuai te pawh an awm ta a, Pathian venna leh damna te dil sak ila.
Khawhar chhungte leh kan member damlo te Hospital leh mahni in lama in enkawl te tan tawngtai sak ila.
Kan hma lawkah ringtute hunpui Krismas kan thleng dawn a. Kum dang angin kan hmang theilo maithei. Mahse Pathian hruaina kan chan a, he krismas ah hian Pathian awmpuina kohhran hoten kan chan theih nan kum dang zawng aia hlawk zawka kan hman theih nan i dil ang u.
Kan thuchah ngaihthlak tur kan hlawk pui ngei theih nan Pathian malsawmna dil ila, kan thawhlawm te Pathian hnenah kan hlan bawk dawn nia.
2 Tim.3:1
Ni hnuhnûngah chuan hun khirh tak a lo thleng dâwn tih hre rawh.
Marka 13:7-8
Indo ri te, indo chanchinte in hriat hunah pawh thlaphâng suh ang che u, chûng chu lo thleng tûr rêng a ni; hun tawp erawh zawng a ni rih lo ve. Hnam hrang leh hnam hrang an indo vang a, sawrkâr leh sawrkâr an indo vang, hmun hrang hrangah lîr a nghîng ang a, ṭâm a la tla ang. Chûng chu nau vei a inṭan ta tihna a ni.
II Korinth 12 1-4
Sâwt chuang lo mah se, ka han uang ve teh ang. Ka hnêna Lalpa inlârna leh a thu puan ka han sawi zêl teh ang. Kum sâwm leh pali a ni ta, Kristaa awm mi pakhat ka hria - chu mi chu vân thumna meuhva hruai chhohvin a awm a, a hringhrânin a ni nge ni lo tih erawh chu ka hre lo, Pathianin a hria. Chu mi ngei chu Paradis-ah hruai chhohvin a awm a, a tak nge zêl tih chu ka hre lo, Pathianin a hria; chu mi chuan mihringte sawi thian loh leh sawi hleih theih loh thu a hria tih ka hria.
THUCHAH
THUPUI: “HUN THIM LEH KHIRH KARA ISUA ZUITU LEH RAWNGBAWLNA”
- Upa C Lalzarmawia
Audio
Tukin Pathian ni zinga Kohhran Programme pawimawh taka thusawi tura kan hotuten min han ruat ve hi phulo ka intih rualin ka lawm hle a, tlanchhiat san phal chi-ah ka ngai lova,ka phak ang tawkin Pathianin ka thinlunga thu a dah te chu ka han sawi ve dawn, a ka lawmin a hlu ka ti hle a ni.Hei kan hriat angin Hripui Covid 19 avangin hun rei tak kan Inkhawm thei tawh lova,Sunday School kan kal thei tawh hek lo,Zaikhawm emaw Work Camp kalte leh Inkhawmpui neih thlengin kan tawp ta thuap vek mai a nih hi.
Khawvel hian hun khirh leh harsa tak kan tawk chho mek a , hun zalen leh hun hlimawm a nei leh thei ang em tih hi zawhna chhan har tak a ni ta. Bible-in hun hnuhnung a tih kha a tawng tan ta mek a niin a lang.Chuvangin hun thar leh ramthar-ah kan lut mek a, he hmunah hi chuan rawngbawlna thar leh Isua hnungzuitu ni tur chuan kan tih thin dan Inkhawm dual dual,Camping leh Crusade neih leh lam hup hup lam kha a rem ta lo a , mahni chauh pawh a Isua zuitu, leh Lalpa rawngbawltu kan nih a hun ta a nih hi tiin ka ngaihtuah fo thin a ni. Chuvangin vawiin zingah hian Pathian thuchah ngaithla-in,zirho ta ila ka tih chu ‘Hun thim leh khirh kara rawngbawlna ‘ tih hi ka han thlang chhuak ta a ni.Hei thuchah hi thlirna kawng khat mai a ni a,ngaihdan kawng dang dangte a awm thei tho bawk awm e. Kan thuchahte a rei lutuk loh nan Point 2/3 velah then ta ila tiin ka han ruahman ta a ni :
1. Hun khirh leh hun harsaah khawvel hi a penlut mek a ni :- Tirhkoh Paulan 2 Tim 3:1 a sawi ang khan “Ni hnuhnungahte chuan hun khirh takte a lo awm ang”a tih hun kha kan dai lut ta mek a ni tih hi hai theih a ni ta lo. Chuvangin, he hun thar leh he ram thar a Ringtute hruailuh a kan awm mekna hi ringtute leh Kohhran hruaitute hian hre tura kan thlarau mit a men a va hun ta em!. Enge hun khirh leh hun hnuhnung a nihna chu ? Marka 13:8 ah Lal Isuan hun hnuhnung a thil thleng tur a sawi te kha enge ni kha? “Hnam hrang leh hnam hrang an indo ang a,ram hrang leh ram hrang an indo vang a,hmun hrang hrangah lirte a nghing ang a,tam te a tla ang;chung chu nau vei tantirhna a ni” a tih hun kha kan thleng ta tih tunlai khawvel thil thleng ngun taka chhut hian a chiang em em a ni ti rawh u.He hun khirh takah kan penluh mek avang hian Zalen taka Biak In khat tlat a kan inkhawm te, Lalpa fak leh chawimawi a kan zai thup thup te, Lam tual a kan lam suau suau hun kha a tawp ta a ni lo maw ?.Han ngaituah ve mah teh u, Christmas kan hmalawk a lo thleng tur te hi kan Inkhawm thei ngut chuang lovang a, Christmas ruaite hi kan theh theih a va rinawm ta lo ve !! Heng kawng tlemte kan kal phung persana kan tih dan danglam ta lutuk han thlir hian hun thar,Ram tharah lutin hun
khirh leh harsa tak chuan min tuam ta mek a ni lo maw? Heng harsatna leh buaina chi hrang hrang kan tawhte hi nguntakin han chhut ta ila, hun hnuhnung tih hi kan pawm theihloh pawhin kan Lal Isua tawngkam, “Nauvei tan tirhna” tih hi khawvel hian dai lut ta mek a va ni awm em! (Mathaia 24:8;Marka 13:8). Chuvangin , tuna kan hun tawng mek hi Kristian nun nawm chenna, lam luih luihna , a huhova Krista hnung zui hup hupna,chawlhni a mawi tak leh nalh taka a huhova Biak In lianpui pui a kal dual dualna hun kha a tawp ta ni hialin a chhut theih ta.Han chhut chiang mah teh u, Inkhawmpui nei a, Palai sang/sing tel nen a,Pandal lian pui pui a Lalpa Pathian kan fak a, kan lam dual dual hunte kha tawpin Lalpa hian hun thar,ram thar min hruai thleng ta mek ni hian ka hre tlat a ni.
Hetiang dinhmuna Lalpan Kohhran leh ringtute min hruai thlen mek lai hian nang ringtu unau duhtak a huhova Kristian dual dual hi a theih ta lo,mahni chauh a Lal Isua zuitu rinawm ni tura i inbuatsaih a va tul ta em! Kohhran hruaitute pawh i harh ang u, hei kum thar Planning-te pawh kan siam leh dawn Planning leh Budget (Kohhran Kalsiam) kan duan lawk hunah pawh kan buaipui em em Covid 19 hmang hian Lalpan hun thar min hruai thleng a ni tih hriain, a dual dual nun kalsan a,Pawl(Group)tlem te te leh mimal ang te a huaisen taka Lal Isua hnung kan zui a, a rawng kan bawl theihna turin ruahmanna siam i tum teh ang u ka ti a ni.
Kan Kohhran FO lam hruaitute pawh Planning & Budget kan siam lehna turah pawh Home Visit, a langlo nun ngaih pawimawh leh mahni chauh pawh a Isua Zuitu rinawm ni tura hma kan lak a ruahmanna kan siam uar sauh sauh a va pawimawh dawn em! Chutilo chu, nikum lam Planning leh Budget kan siam Inkhawm hup hup leh a huau huau tam ,Inkhawmpui lian leh ropui fu fu er a tih kan tum leh vaih chuan chumi kha mi avang chuan kan ti theilo,kan nei theilo kan ti leh sup sup mai ang tih a va hlauhawm em! Aw, Hruaitu leh Kohhran memberte harh ang u,vawiin a Kohhran hote Lalpa min hruaina ram hi hre turin i thlarau mit Lalpan ti meng mawlh rawh se.
2. Mahni chauh/pawl tlem deuh pawhin Lalpa rawngbawl leh chibai bukna uar sauh sauh rawh :- Khawvelin hun khirh leh hun harsa a tawng a,Kohhran hian tuarna leh harsatna a hmachhawn mek lai leh Covid 19 hripui hian kan nun phung leh kan rawngbawlna leh Pathian chibai bukna a her dang lam mek lai hian ringtu tam tak, Kohhran hruaitu thlengin kal ngaihna hre lo leh inthlah dahna hunah mi tam tak chu kan tang khang mek a nih hi. Kan sawi tak ang khan Biak In-ah a nawlpuia inkhawm a theih ta lo,vanneih thlak takin keini Kohhran chuan Programme fel tak leh Sermon tha tak tak hmangin Chhung Inkhawm angin kan kalpui chho ta zel a, a va lawmawmin a va hlu tak em! Nimahsela hei mai hi a tawk hauhlo tih hi kan nun kan en theuh chuan kan inhre thei awm e.Helai a ka han sawi duh tak chu, mahni chauh a Bible chhiar a, Pathian thu dawng tura fianrial a Note Book nen a inchhawp a Lalpa au thin kan nih hi a va han hun tawh em! Kan Biak In-te pawh hi a nawlpui a inkhawm a theih tawh loh chuan Group-te zawk, Sorkar dan bawhchhe si lova Tawngtaina leh sharing neihna hmun atan Kohhran hruaitute hian Committee rel ngei a kan hawn zau a va hun ta ve! FO-ho tan inchhawk a,Biak In a tawngtai leh Bible Study neihna atan te kan rel a,hma kan lak tak tak hi a tul ta a ni lo maw? Chhungkaw bik crusade (Family Crusade)te pawh hi kan neih ngam a tul ta a ni lawm ni. Chuti a nih loh chuan rin aiin Kristian nun hi a lo ro thei riau a nia,a nih loh pawhin khawvel thil leh damchhung khawsak ngaihtuahna lamah hian nasa takin kan tlan chiam chiam thei tlat a nia.Kohhran pum huap Camping leh Crusade-te kan han rel a, Budget-ah cheng nuai 3/4 te kan han dah a, mahse kan nei thei ta hauh lo mai…nimahsela Lalpan Camping min buatsaih sak a tum dan chu a duh tak tak tan Campers mi 5/6 emaw 10 vel lek tan a lo ni tawh si, hei tak mai te hi Camping fund atan kan dah te hi kan senso-na tur chu a lo ni daih zawk a ni tih te hi kan hriat a, kan thlarau mit a men te hi a va hun ta em!.Heng kan Biak In choka leh SS Hal-te thleng hian mi tlemte ,a duh tak tak, tuihal tak tak mi tlemte tan camp nan kan phalsak hial te pawh a tul ta a nih hi.
3. Lalpa ‘Aw’ hre thei, thu nung dawng thin kan nih a pawimawh :- A tawp berah chuan he thu hi han sawi kai leh hram ka duh tlat a ni, a pawimawh em em si a. He hun khirh, hun hnuhnung leh Nauvei tantirhna hunah hian thil pawimawh ta em em mai chu ‘ Lalpa Aw hre thin, a hnen atanga thu dawng thin’ kan nih hi a pawimawh tak zet a ni.Tunlai hun khirh leh harsa karah hian huaisen leh thiltih theihna nen a rawngbawl tur chuan Chung lam atanga dawn kan neih a,kan chian hi a tul takzet tawh a ni. Sermon-te theih tawp chhuah a kan buatsaih chuan mihring tak pawhin kan khawr pum ve mai a, tlawr takin sawi mah ila a nung zui lo fo thin,Lalpa atanga thunung dawnga , a aw kan hriat phawt chuan a nung a, thil a tithei ngei ngei thin a ni.Kristiante khawvelah kan mi ropui ber mai Tirhkoh Paula rawngbawlna kha engatinge a nun a, thil a tihtheih bik kan tih chuan Pathian atangin inlarna leh hriattirna thu a dawn thin vang a ni tih hi i ngaihtuah ngai em? II Korinth 12:1-10 thute kha han chhiar tai la ‘Lalpa hnen ata inlarna leh hriattirna’ a dawn thu nasa takin a sawi a,chang 7-naah phei chuan “Hriattirna chu a nasat em em avanga ka inngaih hlut lutuk loh nan ka tisaah hling min pe..” a ti hial a nih kha. Tunlai hun khirh leh hun harsa tak karah hian Kohhrana Hruaitute leh Fellowship Organisation lama hruaitute,Office Bearers-te, Executive Committee member leh ringtu tinte inngaituah chiang ang u, Lalpa atangin, chunglam atang hian Pathian thu nung hi dawn i neih ngei ngei a ngai tawh,i chhiar tamna emaw i hriatzau-na emaw i sap tawng thiamna atanga rawngbawlna kha tunlai khawvelah
Thlarau a rawngbawl nan a tawk tawh lo, chung lam atanga dawn, thu nung i neih a ngai tawh a ni tih hi ka sawi duh a ni.Chutiang rawngbawlna chu a nung a, thil a tithei a ni tih hi huai takin ka sawi ngam a ni.Chutiang rawngbawltu, hruaitu ni turin tun hun hnuhnungah hian tha hnem ngai takin kan inchah thar leh a ni.Thu tha pui pui, fing tak tak tute sawi emaw kan la khawm a, a tha lutuk nimahsela a pawimawh ber chu Lalpa hnen atanga i dawn thu nung, Lalpa thu hriattir che kha a ni mite nun ti danglama, Krista hnen hruai thlengtu, mite rilru tivartu tak tak chu.Vawiinah hian Rawngbawltu leh F.O lama hruaitu zawng zawngte leh Kohhran mipui te u Lalpa ke bulah thu ila, a aw hre thei turin i inbuatsaih sauh sauh teh ang u.
Khaikhawmna : Awle, Lalpa kan Pathian hian a kohhranhote hi Ram thar, hun thar, Hunkhirh tak leh Nau vei tantirhna ramah min hruai lut mek a ni tih hi kan Pathian thu a Lal Isua thusawi atang leh tunlai thil awmzia han chhut a, han zir chian hian chiang takin kan hmu thei a ni. Chuvangin mahni chauh emaw Pawl tlem zawk a insiam a huaisen taka pen chhuah te, Pindan chhungril a Lalpa pawl a, a aw hre tura kan inkhung te hi a va pawimawh thar ta em! Kan hma lawkah hian harsatna leh tuar tur, tam ,Lirnghing leh Indona lo thleng mekah hian Kohhranhote pawh hian hreawm tuarna kawng,Kross kawng zawh tura kan inzirtir a, kan infuih thar sauh sauh hi a va hun tak em! He hun khirh, hun thim, Nauvei tantirhna kan dailuh meknaah hian Rawngbawltu leh Kohhran, FO lama hruaitute mai ni lovin ringtu mimal tinte Lalpa Aw hre thei tur leh a thunung dawng thei tura kan inbuatsaih sauh sauh hi a va pawimawh dawn em . Lalpa Kohhranhote i harh ang u, tun hi eng hun nge hriatna tur a beng nei chuan hre rawh se. Pathianin a thu kan sawite kan zavai atan malsawm rawh se. Amen.
Hla sak hona:Khb No 445: I hun tithianghlim la, Lalpa pawl fo rawh
Music Track
I hun tithianghlim la, Lalpa pawl fo rawh
I hun tithianghlim la, Lalpa pawl fo rawh,
Amah chu kumkhuain ring tlat zel ang che;
Pathian fate thian la, chak lo tanpuiin,
Ama malsawmna chu i lo chan theih nan.
I hun tithianghlim la, khawvel a ral mek,
I hun hlu zawng zawngte Isua tan hmang rawh;
Amah i an theih nan Isua en fo rawh,
I thiltih zawng zawngah amah ang turin.
I hun tithianghlim la, Lalpa thu thuin,
A hnen atang chuanin vak bo tawh suh la;
Lungngaih leh lawm laiin amah chu zui la,
Isua lam en fovin a thu ring tlat rawh.
I hun tithianghlim la, i rilru zawng nen,
I ngaihtuah a piangte ama thu thuin;
Hmangaih tuikhur hluah aman a hruai ang,
Van lamah ama rawng i bawl thei thuai ang.
