Hla sak hona: Mahni duhzawng thlan ni se.(Thilpek lakkhawmna)
TAWNGTAI RUALNA
Tawngtaina a Hriat Turte
Pathian ropui leh thiltithei, Khawvela thil thleng zawng zawng chunga thuneitu kan neih avangin a hnenah lawmthu sawi ila. Chawimawina leh ropuina i hlan, a hruaia awm zel turin mimal tin a hnenah vawiinah hian i in tulut thar ang u.
Kan chhungkua Pathian hnenah i hlan thar ila, A kaihhruaina a intuluta Amah nena lengdun thei turin Thlarauthianghlim tanpuina i dil ang u.
Covid19 vei enkawltu zawng zawngte tan Pathian venhimna leh Pathian atanga chakna thar leh hmangaihna nena covid19 vei damlo te an enkawl theihna turin dil sak ila. Tin, mipuite hian thuawih taka kan himna tur te kan zawm a, kan fimkhur zel theihna turin Pathian tanpuina dil ila.
Kan Missionary te tawngtai sak ila. Covid19 in a tihbuai te pawh an awm ta a, Pathian venna leh damna te dil sak ila.
Kan kohhran member kum upa lam te, ruihhlo in a tihbuai leh damlo te Hospital leh mahni in lama in enkawl te tan tawngtai sak ila.
Kan hma lawkah ringtute hunpui Krismas kan thleng dawn a. Kum dang angin kan hmang dawnlo mah ila Pathian hruaina kan chan a, he krismas ah hian Pathian awmpuina kohhran hoten kan chan theih nan leh kum dang zawng aia hlawk zawka kan hman theih nan i dil ang u.
Kan thuchah ngaihthlak tur kan hlawk pui ngei theih nan Pathian malsawmna dil ila, kan thawhlawm te Pathian hnenah kan hlan bawk dawn nia.
Isaia 9:6
Kan tân nau a lo piang a,
Fapa min pe ta a.
Sawrkârna chu a kovah a innghat a,
A hmingah chuan: Remruattua, Maka, Pathian Chaka,
Chatuan Pa, Remna Lal an ti ang.
Luka 2: 8-14
Tin, chumi ram vêkah chuan berâm vêngtute an awm a, zânah an berâmho an vêng a, phûlah an riahchilh a. 9Tin, Lalpa vântirhkoh pakhat an kiangah a lo ding a, Lalpa ropuinain an vêl chu a rawn chhun êng a; tichuan, an hlau ta êm êm a. 10Tin, vântirhkoh chuan an hnênah, “Hlau suh ulang, ngai rawh u, mi tin ta tûr chanchin ṭha lâwmawm êm êm ka rawn thlen che u a ni. 11Vawiinah hian in tân Davida khuaah Chhandamtu a piang ta, Lal Krista chu. 12Tin, hei hi in tân chhinchhiahna tûr a ni; nausên puana tuam, ran chaw pêkna thlênga mu in hmu ang,” a ti a. 13Tin, thâwklehkhatah vântirhkoh hnênah chuan vâna miho mipui an lo awm ta chiam a, Pathian an fak a,
14“Chungnung berah Pathian ropui takin awm rawh se,
Lei chunga a lawm êm êm mihringte hnênah rem thu lêng rawh se,”
an ti a.
THUCHAH
THUPUI: “INREMNA”
- Upa K. Zathuama
Audio
Kohhran hote Lal Isua hmingin chibai ka buk a che u.
Kumin kum tir lama hripui,Covid-19 thawm kan hriat tirh lai khan mi nawlpui chuan Mizoram hi chu thleng ve em lo turah kan ngai tlangpui niin a lang a. Hun alo kal zel a kan hriat theuh angin kan khawsak dan leh nunphungte chu nasa takin inthlak danglam ve mahsela hmun danga an tuar ang em a tuar lovin mi thahnemngai leh mifelte tawngtaina (Jacoba 5:16) zarah chunglam venhimna kan la chang hi a lawmawm takzet a. Tunah erawh chuan hripuiin min luhchilh ve chu a ni ta reng mai. Chuvangin a sawi tur ber pawh ni a inhre lo chungin kan him tlan theih nana fimkhur theuh turin kan inngen hmasa ngawt mai a ni e.
Kan hun tawngin a zir tak loh em avangin mi tinin kan nghahhlelh leh thlakhlelh em em, kan hunpui Krismas leh Kum thar programme te chu kum danga kan hman angin kan hmang thei dawn ta lo chu a ni a. Chutiang hun danglam tak kara hotute duhsakna changa chanvo pawimawh tak thuchah sawi hun min pe ve hi lawmawm ka tih rualin ka insit hle a. Chuvangin rilru tawngtaina nena min dinpui turin kan inngen bawk a ni e. Krismas vuakvet saphovin ‘Krismas Advent’ an tih hun a ni bawk a, kan thupui atan chuan ‘INREMNA’ tih a ni dawn a ni.
A hmasain naupang pual ni pahfawmin Indopui pahnihna tawp lama American sipai leh German sipai inkara inremna thlen thu i lo ngaithla teh ang.
Indopui pahnihna tawp lamah khan German nu pakhat chu a pasal ral rama a kal avangin a fate nen hmun ralmuang zawk nia ngaiin Rhine lui ruamah ral tlanin thlam (Farm House) pakhatah an awm a. Krismas zanah chuan Krismas hlim taka hmang turin an inbuatsaiha. Ar te talhin, ei leh in tur an siam mek a. Chutih lai chuan pawn lamah thawm an hre ta a. Thawm chu a lo hnai zel a, kawngkhar chu an rawn kik ta a. Hlauthawng rilru tak chung chuan nu ber chuan kawngkhar chu a va hawng dek dek . Chutah a rin loh deuhvin an hmelma America’n sipai an lo ni a, a phu zawk mai a. America’n sipai chuan kawng an bo thu leh an thian pakhat chu hliam na tak tuar anih thu sawiin an ina riah a dil ta a. German nu chuan hmelma thlen chu ram danin a phalloh thu leh mite’n anhriat chuan an
nunna in a tuar tur thu a sawi a. Chuvang chuan hmundang pan mai turin a rawn a. Mahse America’n sipai chuan kawngdang an hriatloh thu leh tanpui an ngaihthu sawi lehin Krismas avanga khawngaih hram turin a ngen a. Chu nu chuan an dinhmun hriatthiampuiin leh Krismas avanga an ngenna ngaipawimawhin Krismas avang chuahvin an ngenna chu a pawm ta a. Inchhungah hruai lutin sipai hliam tuar chu khumah muttirin an enkawl ta a. Krismas hlim taka hmang ho turin an inbuatsaih chhunzawm ta a ni.
Chutianga an inbuatsaih laih laih lai chuan beiseiloh takin kawngkhar kik thawm an hre leh ta tlat mai. German nu chu hlauhna in a khat a, an mikhualte chu an hre ngei dawn a hria in a zam hle mai a. Khur der derin kawngkhar chu ava hawng ta a. A hlauh rilruk ang ngeiin German sipai an lo ni a. An ni chuan riah an duhthu an sawi ve a. Ani chuan mikhual an neih avanga hmundang pan mai turin a rawn a. Nimahsela anni chuan remti hram turin an ngen nawn leh a. A inngaihtuah vang vang a tihian a ti ta a, “Thil pakhat ka ngen ang che u a, in pawm theih chuan in riak dawn nia.” a ti a. German sipai chuan, “ Sawi rawh kan pawm thei ang” tiin a chhang a. Nu chuan, “ Nangmahni ang bawk a kawngbo, riltam, pakhat phei chu hliam a tuar avanga mahnia kal theilo Krismas avanga an ngenna pawmin mi pathum ka lo thleng tawh a,” a’n ngawi det a, “Hmelma sipai an ni a, Krismas avang chauhvin a ni ka thlen ni,” ti deuh tak chung chuan a sawi a. German sipai te chu an in en a, an hotupa chuan, “Awle kan pawm thei e, Krismas a ni a, Krismas avangin engmah buaina kan siam lovang.” a ti ta a. German nu chu lawmin a khat a. Inchhungah a hruai lut a, thilawmzia a sawi hnuin Krismas chibai an inbuk ta hlawm a. “Zanin hi remna Lal, Lal Isua pian zan a ni a, lei danin indo mahila, zaninah chuan Krismas thuchah laimu- Remna nen Krismas hlim takin kan hmangho dawn a ni.” a ti a. Hlim takin Krismas an hmang ta a ni. German sipai zinga pakhat chu Doctor alo ni leh hlauh mai a, ani chuan America’n Sipai hliam te chu a enkawl a, hlim takin Krismas- Remna ruai an kilho ta ani.
Awle, Bible kan en chuan Lal Isua pian thu kan hmu a. Pathian chatuan remruat mak leh ril zia kan hmu thei awm e. Sawifiah thiam leh sawifiah zawh rual pawh a nilo. Lal Isua pian hma kum 700-ah khan zawlnei Isaia chuan thlarau mita hmu lawk in, “Kan tan naupang alo piang a, fapa pekin kan awm ta: Rorelna chu a kokiah a chuang anga, ahmingah chuan Maka, Remruattua, Pathian chaka, Chatuanpa, Remna Lal an ti dawn si a. (Isaia 9:6)” tiin alo puang chhuak diam tawh a ni. Hei hian Pathian thu hi thu tak anihzia ati chiang hle a ni. Krismas hi Lei leh Van inremtawh lo inrem lehna a ni a. Mihring te hnena remthu lentir hi a tum ani. Luka 2: 14 thua kan hmuh Lei mihring te tana thupuan duhawm tak chu, “Lei chunga alawm em em mihringte hnenah Remthu leng rawh se.” tih hi a ni. Remthu a len theihnan chuan Pathianin Lei mihringte a hmangaih em avangin a fapa mal neihchhun a pe a. Lal Isua chuan apa thu zawmin, mihring sual fate kan dam theihnan van hmun ropui kalsanin Lei hmun tlawm berah bul arawn tan ta a. Chu chuan damna, lawmna, hlimna leh thlamuanna arawn thlen ta a ni. Krismas diktak hmangtute ah chuan itsikna te, elrelna leh huatna te’n hmun a chang tawh lova, hmangaihnate, inngaihtlawmna te, dawhtheihna te, midang tana inhman chhuahna- thilpek pekte chuan hmun a chang tawh zawk thin alo ni a, an nunah apar chhuak thin a ni.
Lal Isua nun ze mawi tak chu an nunah arah chhuak thin a ni. Chu chu tunlai khawvel hian a mamawh zual hle in alang a. Kohhran, Khawtlang leh Ram pawh hian a mamawh a. Inremna tello chuan Kohhran pawh anuam thei lova, Khawtlang leh Ram pawh chutiang tho a ni a. Inremna tello chuan Muanna a awm tak tak thei thin lo a ni.
Kumin Krismas ah hian kum dang angin Biakinah te Inkhawm thei lovin, zaikhawm theilo mahila, inremlote inrem nan hmang ila, mimal, Kohhran leh Khawtlangah hian inremna chuan hmun lailum luah sela ava duhawm dawn em! A tawp berah chuan indona hmuna sipaite’n ralthuam dahtha a inremna an nei a Krismas ruai an kilho ang khan kumin Krismas chu inremlo te inrem nan I hmang ve ang u.
Lalpa’n a thu malsawm rawh se..
