Lo cheng ve la, kan run chhungan,
Hmangaihtu Lal Pathian;
Chhungkaw puipa ber lo ni la,
Keini i hmangaih fa.
Tu in pawh Nang i chenna chu,
Rapin, chhawlbuk ni se,
Hlimna leh remna a tel ve,
Van malsawmna hlu nen.
Nang nghilh lovin zing chhun zana,
Auva sawm thintute,
Rilru leh theihna zawng hlantu,
Chu ngei chu i chhungte.
Chhungkaw lungrual, Kristian chhungkua
Kan nih theih nan Lalpa,
Lo cheng ang che Krista, Nang ngei,
Kan in, kan thinlungan.
TAWNGTAI RUALNA
Tawngtaina a Hriat Turte
Pathian malsawmna leh venhimna kan chan avangin lawmthu i sawi ang u. Kristian chhungkaw tha zawk kan lo nih theih na Pathian hnenah chakna i dil ang.
Covid 19 thawh hnihna lo thleng mek lak atanga kan him zel theih nan leh mipui ten a do let kawnga kan mawhphurhna kan hriat theih nan.
Covid 19 avanga enkawl lai mek, a bikin kan kohhran memberte leh kan missionary leh thawktu te tan.
Covid 19 avanga thi chhungte tan te, chhiatna hrang hrang avanga tuar mek Mizoram hmun hrang hrang a mi te tan.
Lockdown kan hmachhawn leh dawn a, fimkhur tak leh thuawih taka kan awm thiam theih nan.
Kan thawhlawm, inkhawmna leh keimahni Pathian hnenah I hlan ang u.
Matthaia 7: 24 -27.
Chutichuan, mi tin heng ka thu hriaa zawm apiang chu, mifing lungpui chunga in satu nen tehkhin tur a ni. Ruahte a lo sur a, tuite a lo lian a, chumi in chu a rawn nam sawk sawk a; nimahsela a chim lova; lungpui chunga rem tlat a nih avangin. Tin, mi tin, heng ka thu hi hriaa zawm lo apaing chu, mi a tiau vut chung maia in satu nen tehkhin tur a ni. Ruahte a lo sur a, tuite a lo lian a, thlite a lo tleh a, chumi in chu a rawn nam sawk sawk a; a chim ta a, a sawp chu nasa tak a ni.
THUCHAH
Thupui : LUNGPUI CHUNGA IN SAK CHU
- Upa F. Aihranga
Audio: Not available
Kohhran member zawng zawng te vawiin Kristian chhungkaw ni ah hian thihna hneha tho leh kan Lalpa Isua Krista hmingin chibai ka buk a che u.
Vawiin hi BCM ni pawimawhte zing ami, “Kristian chhungkaw Ni” a ni tih kan hre theuh awm e. Kan tualchhung kohhran Programme Committee chuan Vawiin Kristian chhungkaw ni kohhran hoten kan hman dan tur uluk takin a ruahman a. Kumdanga kan lo tih thin tawh angin Kan hmangaih chatuan ram pan ta te pualin a duh apiangin Biak Inah pangpar khawi ni se. Chubakah chuan zing inkhawmah solo tur leh chhungkaw pahnih atangin recitation sawi tur in ruat ni se tiin ruahmanna fel tak a lo siam a. Amaherawhchu kan hriat theuh angin Hripui (Covid19) thawh hnihna leng mek avangin Sawrkar chuan ‘Inkharkhip’ (Lockdown) a puang leh ta si a. Kohhran hote Biak Ina inkhawm a rem leh tak loh avangin programme ruahman lawk angin kan kal thei leh ta lo a ni. Amaherawhchu kan tualchhung kohhran chhungtinte leh a hmang thei remchang apiangte hman turin tukin ah hian chhungkaw inkhawma kan hman tur thuchah kan han buatsaih leh ta a ni.
Mizoram Baptist kohhran chuan kum 1948 atangin Kristian chhungkaw ni hi kan lo hmang tan tawh reng mai, kum 73 zet kan hmanna a lo nita reng mai. He ni hi kristian chhungkaw din pawimawhna leh hlutna te, Pathian thu anga chhungkaw enkawl a tul zia inzirtirna hun atan hman thin a ni. Hun a lokal zel a, kohhrante thinlungah ni khat chauh Kristian chhungkaw ni hman duhkhawp lohna a lo lian tial tial a. BCM Assembly 2005 chuan “kumtin Kristian Chhungkaw chawlhkar hman ni rawh se” tiin May thla Pathian ni vawi 3-na, Kristian Chhungkaw ni a hman thin behchhana hman turin a lo rel ta a ni.
Pathian thu ilo chhiar ang u. Matthaia 7: 24 -27. Chutichuan, mi tin heng ka thu hriaa zawm apiang chu, mifing lungpui chunga in satu nen tehkhin tur a ni. Ruahte a lo sur a, tuite a lo lian a, chumi in chu a rawn nam sawk sawk a; nimahsela a chim lova; lungpui chunga rem tlat a nih avangin. Tin, mi tin, heng ka thu hi hriaa zawm lo apaing chu, mi a tiau vut chung maia in satu nen tehkhin tur a ni. Ruahte a lo sur a, tuite a lo lian a, thlite a lo tleh a, chumi in chu a rawn nam sawk sawk a; a chim ta a, a sawp chu nasa tak a ni.
Kumina Kristian Chhungkaw Ni zing lam inkhawm a thupui tur BCM Headquarters atanga rawn thlan sa chu “Lungpui chunga sak in chu”(Mat. 7:25) tih a ni a. Hemi thupui hmang hian thuchah kan sawi dawn a ni.
Kan Pathian thu han tarlan tak khi Lal Isua thusawi a ni a. Tlang chunga Isua thusawi tawp lam ami lak chhuah a ni. Lal Isuan a thu sawi ngaithla tura mipui pungkhawmte hnenah thusawi leh zirtirin an tih tur leh tih loh tur thu hlawm pawimawh tak tak 21 (sawmhnih leh pakhat) lai hmangin a sawi a(Mat. 5,6,7). Chung a thusawi leh a zirtirna thute chu hriaa zawmtu leh zawm lo tute dinhmun tehkhin thu hmanga a sawina a ni. Chung a thusawi hria a, ngaipawimawh zui a, zawmtute chu mifing, lungpui chunga in satu nen a tehkhin a. Ruah a lo sur a, tuite a lo lian a, chumi in chu rawn nam swk sawk mahsela, chumi in chu a chim lova, lungpui chunga rem tlat a nih avangin. Amaherawhchu a thu ngaithla ve si ngaipawimawh lova, zawm duh lotute chu, mi a, tiauvut chunga in satu angin a tehkhin ve thung a. Ruahte a lo sura, tuite a lo lian a, thlite a lo tleh a, mi a in sak chu a rawn nam sawk sawk ta mai a, tiavut chung maia sak a nih avangin a chim ta rup mai a. a sawp chu nasa tak a ni a la ti zui.
Helaia Lal Isua thusawi atang hian ‘thuhretu’ mi chi hnih kan hmu a. Thu chu an hre ve ve a, pakhat zawk chuan a thu hriat chu thu pawmawm tak, innghahna tlak, a zawm chuan atan a tha dawn a ni tih hriain a zawm nghal hmiah mai a. Pakhat ve thung chuan thu chu hre ve tho mahse engngahmah ngai lovin, zawm tumna pawh a nei lo. Thutak hriaa zawmtu, Lal Isuan lungpui chunga in sa a tih hi ngaihzam mai chi a nilo. Kan chhungkaw tan, kan kohhran leh khawtlang tan, kan ram tan a pawimawh em em a ni. Lal Isuan, “Tupawh ka thu hriaa mi tirtu ring chuan chatuana nunna a nei tawh” (Joh. 5:24) a ti hmiah mai a ni. Lal Isua thuzawm chu chatuan nun neihna a ni.
Kan thupui kha ‘lungpui chunga sak in chu’ tih a ni a. Bible ah hian ‘lungpui’ tih hi hmun tam takah kan hmu a. Thuthlung hlui ah chuan, Pathian sawi nan, “Lungpuia chu” (Deut. 32:4) tih te, “ka Pathian ang lungpui” (ISam. 2:2), “Lalpa chu ka lungpui nghet tak, ka lungpui leh mi tlantu” (Sam 18:2, 19:14) adt. tiin kan hmu a. Thuthlung thar ah “chu lungpui chu Krista a ni” (IKor. 10:4) tiin kan hmu a. Chutichuan lungpui chu, Pathian, Isua Krista chu a ni a, in chu kan chenna tura sak in(house) ni lovin, keimahni, mihringte hi kan ni.
Vawiinah Kristian chhungkaw ni kan hmang mek. Kristian chhungkua chu engnge? Kristian chhungkua chu Isuaa Krista neitu chhungkua, Isua thu zawmtu chhungkua, Isua be thin, a hmaa kun thin chhungkua, Chhungkaw kaihruaitu atana Isua leh a thusawite innghah nana hmang kan ti thei ang.
Chhungkua chu, School hmasa ber, sawrkar te ber, Rawngbawlna Mission field hnai ber an lo ti thin. Chhungkua hi kohhran, khawtlang leh mimal nun siamtu bulpui ber a ni. Kan thil hriat hmasak ber chu chhungkua atanga kan hriat a ni a. Kan thil zir hmasak ber pawh chhungkua atanga kan zir a ni. Chhungkua chu thlarau, rilru leh taksa lama kan mamawh inphuhruk tawnna hmun tur a ni a. Chhungkaw tam tak ah hian heng kan mamawhte hi phuhruk in a awm em? Heng kan mamawhte hi chhungkuaah kan hmuh loh chuan pawn lamah dap a ngai, ruihhlovah, thiante ah, kawmkar leh hmun remchang dangah. Hei hian nghawng thalo tak a nei thin. “A sawp chu nasa tak a ni” tih ang mai kha chhungkuaah a lo thleng thin.
Kristian chhungkua kan nih theihna tur hian engnge kan innghahna tur, tu thu nge kan zawm anga, tute nge kan entawn ang tih hi ngaihtuah a va ngai em! Chhungkuaa kan inzirtirnate hi ram changkangte tihdan ni mai lovin Bible min zirtir dan ni rawh se.
Kristian chhungkua innghahna chu Kristaah a ni tur a ni. Kristaa kan inngha tlat a, bul tan nan kan hmana, Isua thu hriaa zawmtu ni tura tan lak ava tul em. Khawvelah kan chenga, tul leh mamawh tam tak kan nei. Khawvel thila intlansiakna hrang hrang, ropuina, hausakna, sanna, thuneihna, nawmsakna kan thlakhlelhna te hian chhungkua nasa takin min ei chhe mek a ni. Chumi piah lamah tun hunah phei chuan hripui leng mek avangin kan buaiin kan mangang em em a. Kalphung pangngai angin engmah a tih theih lova. Mimal, chhungkua, kohhran, khawtlang, leh ram a nghawnng a. tahna leh lungngaihna ten min chim mek a. Hetiang dinhmuna kan din mek lai hian lungpui nghet Isua Krista rinchhan tlattu chhungkua ni turin tan i la ang u. Kan innghahna tam takte hi chu a nghing leh mai thin a nih hi. Lalpa ringtu, a rinchhan Lalpa, tui kianga thingphun, lui kama zung kai, khawkhen kum pawisa lo, rah chhuah thulh chuanglo (Jer. 17:2-8) ang hi kan chhungkaw nihna lo ni se.
“Lungpui chunga sak in” nghet tak chhungkua kan nih theuh theih nan Lalpan mal min sawm sak theuh rawh se.
“ Kristian chhungkua, Lalpa chenna te chu,
Kumkhuain a nghing lo, an chuai ve ngai lo
Lungpuia in sa in an nghing ve ngai lo
Chatuanin an him reng dawn a ni”.
