Hla sak hona:KHB No 417. “Ni ai pawha eng ropui zawk chu…”.(Thilpek lakkhawmna)
Ni ai pawha eng ropui zawk chu
Ni ai pawha eng ropui zawk chu,
Ka thinlungah a eng;
Khawvel eng aia eng zawk chu,
Isua ka eng a ni.
Aw, malsawmna ni chu a eng,
Muanna leh lawmnain a lo khat;
Lal hmel lawmawm ka en chhungin,
Ka thlarau lawmin a khat.
Lalpa ka pawlin ka thinlungah,
Thlamuanna tui a luang;
Ka thinlunga lawmna ri chu,
Thatnain apar chhuak.
Ka thinlungah lawmna a awm a,
Beiseina leh fakna;
Tunah malsawmnain min vur,
Van lawmna min hriattir.
TAWNGTAI RUALNA
Tawngtaina a Hriat Turte
Pathian ropui leh thiltithei, Khawvela thil thleng zawng zawng chunga thuneitu kan neih avangin a hnenah lawmthu sawi ila. Chawimawina leh ropuina i hlan ang u.
Covid19 avangin a huhovin la inkhawm thei lo mah ila, chhungkua leh mimal anga Pathian biakna hun tha kan la neih theih avangin lawmthu i sawi ang u. Covid19 hripui a reh hunah pawh chhungkua leh mimal nuna Pathian pawlna nung nei chhunzawm thei turin Pathian hnenah inhlan ila. A huhova Pathian Biakna hun kan neih leh thuai theih nan Pathian hnenah i dil ang u.
Tun thlenga Mizoramin Pathian ven himna dawnga covid19 thihpui kan la awm loh avangte leh community spread nasa tak kan la tuar loh avangin Pathian hnenah thinlung takin lawmthu sawi ila. Pathian venhimna dil chhunzawm zel ang u.
Sawrkar, Kohhran leh tlawmngai pawl te tan tawngtai zel ila. Covid19 dona kawnga fing leh tha taka hma an lak thiam theihna turin i dil sak ang u.
Kan Missionary te tawngtai sak ila. Covid19 in a tihbuai te pawh an awm ta a, Pathian venna leh damna te dil sak ila.
Kan member damlo te Hospital leh mahni in lama in enkawl te tan tawngtai sak ila.
Kan thuchah ngaihthlak tur kan hlawk pui ngei theih nan Pathian malsawmna dil ila, kan thawhlawm te Pathian hnenah kan hlan bawk dawn nia.
Philippi 4:10-13: Nimahsela, in mi ngaihtuahzia tûn hnua in rawn tihthar leh tâk avâng hian, Lalpaah chuan ka lâwm hle a ni; chutiang kawng chu ngaihtuah kha zawng in ngaihtuah teh meuh va, remchâng erawh chu in hmu lo mai a ni. Ka tlâkchham thu sawi zawng ka ni lo ve; kei zawng eng ang pawhin awm mah ila, lungawi zêl ka chîng tawh si a. Tlâwm taka awm dân ka thiam a, hausaa awm dân pawh ka thiam bawk a; thil tinrêngah leh thil zawng zawngah tlai leh rilṭâma awm dân, hausa leh tlachhama awm dân thurûk chu ka hre chhuak tawh. 13Mi tichaktuah chuan engkim ka ti thei a ni.
1 Tim 1:12-13: Mi tichaktu Krista Isua kan Lalpa hnênah chuan lâwm thu ka sawi a ni, hmânah sawichhetu leh tiduhdahtu leh sawisatu ni mah ila, rinawma mi ngaiha, a rawngbâwltua mi ruat tâk avâng hian; nimahsela, ring lo chunga hre lova ti ka nih avângin a ni, zahngaihna ka lo hmuh ni;
THUCHAH
THUPUI: “Tunge ka nih ?”
- Rev H. Lianngaia
Vawikhat chu paho inkawmkhawm zingah “Tunge i nih?” tih hi an zawt a. “Nupui ka neih tawh avangin kei chu Pasal ka ni”,”Fa ka neih tawh avangin kei chu Pa ka ni”, “Sorkar department pakhatah a hotu ber ka nih avangin Officer ka ni”, tiin an chhang hlawm a. An zinga Hindu pa chuan an sakhaw thurin hmangin, “Kei chu chatuan thlarau (eternal soul) ka ni”, a han ti ve leh a; an zinga Kristian pakhat chuan “ Kei chu Isua ringtu ka ni a, Kristian ka ni” a han ti ve leh a. Heng chhannate hi engemaw chen chu a dik vek e, mahse eng ang Pa nge, eng ang Pasal nge, eng ang thlarau mi nge, eng ang Kristian nge kan nih tih hi a pawimawh lai tak chu a ni.
Saptawng Bible-ah hian vawi 300 aia tam “Ka ni” (I am) tiin Pathianin amah inhriattirna thu (self introduction) a sawi a. Lal Isua pawin “Ka ni” tih hi a sawi fo mai. Kei hi Nunna chang, Khawvel êng, Kawngkhar, Berampu tha, Thawhlehna leh nunna, Kawng leh Thu tak leh nunna, Grep tak hrui, Hmasaber leh Hnuhnungber, a Bul leh Tawp ka ni titein mihringte tana a nihna dik tak chu a puang thin. Pathian tan tunge ka nih ve ? Midangte tan ka nihna puan tur engnge ka neih ve le ?
Lal Isuan a nihna dik tak a sawi fo chung pawh khan “Miten Mihring Fapa hi tu nge a ni an tih ?” tiin mi hriat dan hre duhin a zirtirte a la zawt ta fo a nih kha; mi min hriat dan hi a pawimawh, mahse min hre fuh lo ve thei tho. Ram hruaitute lek phei chu kan hriat dan a in-ang lo nasa khawp mai, party-a kan awmna azirin kan hmuh leh hriat dan a dang daih. Mahni inhriat phei hi chu a har lehzual a niang “Amah a inhre der si lova, mahni inhre hawt loin” kan tih fo hi. A nih leh tunge ka niha, engnge ka nihna dik tak chu ?, chu chu engtin nge ka hriat theih tak ang ? .
1. Mahni chauha awm laiin: Martin Luthera chuan “Mihring chu tuma hmuh loh leh hriat loha mahni chauha kan awma kan nihna leh thiltih hi kan nihna dik tak chu a ni” a ti a. Josefa chu tuma hmuh loh leh hriat loha a pu Potiphara nupuiin a thlem lai khan “…engtin nge he sual lian tak hi tiin Pathian chungah thil ka tihsual theih ang ?” a tih khan Pathian tih mi, mi rinawm a nih zia a tichiang a ni(Gen 39:9). Kohhran din tirh lai khan Anania leh a nupui Saphiri te khan ram an hralhna man kha Tirhkohte hnenah an hralhna man zawng zawng rawn thawh angin an insawi ngawt a, a then an lo zep ru reng si, engnge an chungah lo thleng ta kha ?. Pathian tih lo,Thlarau Thianghlim bum tum, mi rinawm lo, dam reng tlak lo an nih zia a lo lang ta mai a nih kha. Tuma hmuh loh leh hriat loha kan nihna leh tih thin- nitina kan hna thawhna leh thawh danah te, kan zin veivahna leh mikhualna hmunah te, inthlannaa kan vote thlaknaah te etc, kan nihna dik tak leh kan Kristian dan dik tak chu a chiang ber a ni. Covid-19 avanga Biak In leh huho kristian theih lohna hun leh hmunah hian tunge ka niha ka kristian dan hi eng chiah nge a lo nih tiin mahni inenfiah ila.
2. Hun tawng thim ber laiin: Pathian thu hriltu pakhat chuan “Mihring chu kan hun tawng thim ber laia kan zia hi kan nihna dik tak a ni”, a ti ve thung. Hetih hunah hian thenkhat chu kan kun tlawk tlawk a, thenkhat thung chu kan thin urin a chhan nia kan hriatte kan tawng chiam bawk a. Thenkhat kan beidawng ngawih ngawih a, thenkhat chu kan hmel hmuh nuam lo khawpin kan awm thin; kha chiah kha kan nihna dik tak chu a ni. Mahse Pathian mite chuan “Tahna ruam chu an zawhin tuihna awmnate an siam thin” (Sam 84:6) zawk a. “Aw ka nunna, engah nge i kun reng ? Engah nge ka chhungah hian i buai ni ? Pathian beisei rawh” (Sam 42:11) tiin ân buan buan aiin Pathianah chakna thar lak nan an hmang zawk thin a ni. A hun tawng thim ber lai pawhin Lal Isuan chuang amah khengbettute tan ngaihdamna dilsakin a tawngtaisaka, a tuar laiin a vau lo va, fel taka ngaihtuah thintua hnena a inpe zawk (1Pet 2:23) ang khan Pathianah phurrit tin reng nghatin hahchawlh nan an hmang zawk thin a ni.
3. Arpa chan laiin: Pipute chuan “Lal ngai lo lal a nâ, an lal a khâ” an ti. Roreltu ni ngai loin rorelna dawhkan an han kil ve a, khawsak harsa thin te an lo hausa ve a, bose ni ngai lo bose niin sir ni ngai lo sir an han ni ve a, mi dang harsatna leh dinhmun hriatthiampui loin an chungah hlei an lên fo zawk thin tihna a ni. Chhiahhlawh pakhat lung ina tang, Pharaoa uain hlantu khan a mumang hrilhfiahsak tura Josefa a mamawh tehlul nen khan a han chhuak ta cheng a, Josefa chu a hre leh duh der tawh lo (Gen 40:9-23). “Campeign laia min hriat tehlul nen a tlin hnu hian min hre duh tawh lo”, kan tih thin hi a dik a nih ngai chuan chu tak chu a nia an mize dik tak chu ni. Chan tha chan laia kan nih leh tihte hi kan nihna dik tak chu a ni thin. Mahse kan Pathian leh Pa mit hmuha sakhaw biak dan thianghlim …chu..fahrah leh hmeithaite an hrehawm laia kan hi a ni zawk (Jacoba 1:27). Hotu chhiahhlawh (servant-leader. (Matt 20:25ff; Mk 10:42ff) nih hi Pathian lawm zawng tak a ni.
4. Kristaah: Isua Kristaah hian mihring nihna chu a chiang ber. Thlarau Thianghlimin mihring mit a tihvarsaka, mahni a han inhmuhtir meuh chuan amahah tlinna reng a hmu tawh lo. Chapo tur a awm tawh lo, amah aia midang tha lo zawka hmu tur a awm tawh lo. Tirhkoh Paula pawhin ”Keimahah thil tha reng a awm lo tih ka hria (Rom 7:18), “..an zinga mi sual ber ka nih hi” (1 Tim 1:15-16), “ ..tirhkohva vuah tlak loh ka ni si a (1 Kor 15:9) a ti hial a nih kha. Mahse Pathian khawngaihna avangin Krista Isua chu atan finna te, felna te,thianghlimna te leh tlanna te (1 Kor 1:30) a nih zia a han hriat chian leh meuh chuan “Kei zawng eng ang pawhin awm mah ila, lungawi zel ka ching tawh si a…Mi tichaktuah chuan engkim ka ti thei ani”(Phil 4:10-13) tiin a tunhma Saula kha vui liamin, Lalpa hman theih tur mi a lo ni ta..
Hruaitu ropui Mosian “Kei Pharaoa hnena kala, Israela thlahte Aigupta ram ata zuk hruai chhuaktu atan chuan tu nge maw ka nih le?” (Ex 3:11) tia hruaitu atana tlinnaa nei lo nia a inhriatna chiah kha Pathian hmantlak a nihna a lo ni zawk a. “I hnenah ka awm dawn alawm” tiin a chakna thahrui chu Lalpa a ni tih a hriattir a nih kha. “Harsatna namen lo tak tak te chuan englai pawhin min delh reng a, chung aia nasa zawk pawh chu a lo la thleng ngei ang; chuvang chuan hmalam panin kan kal zel ang” tia William Carey leh a thiante thupui khauh tak mai hi kan nun leh rawngbawlna thunawn (chorus) lo ni ve rawh se.
Hla sak hona:Khb No 433: KLo cheng ve la, kan run chhungan
Audio
Lo cheng ve la, kan run chhungan
Lo cheng ve la, kan run chhungan,
Hmangaihtu Lal Pathian;
Chhungkaw puipa ber lo ni la,
Keini i hmangaih fa.
Tu in pawh Nang i chenna chu,
Rapin, chhawlbuk ni se,
Hlimna leh remna a tel ve,
Van malsawmna hlu nen.
Nang nghilh lovin zing chhun zana,
Auva sawm thintute,
Rilru leh theihna zawng hlantu,
Chu ngei chu i chhungte.
Chhungkaw lungrual, Kristian chhungkua
Kan nih theih nan Lalpa,
Lo cheng ang che Krista, Nang ngei,
Kan in, kan thinlungan.
